کشمیر عالمی سطح پر تسلیم شدہ متنازع علاقہ، بھارت حقائق مسخ نہیں کر سکتا: خواجہ آصف

وفاقی وزیر دفاع خواجہ آصف نے بھارتی وزیر دفاع کے حالیہ غیر ذمہ دارانہ بیانات کو دوٹوک انداز میں مسترد کرتے ہوئے کہا ہے کہ بھارت جارحانہ بیانیے اور سیاسی دباؤ کے ذریعے بین الاقوامی طور پر تسلیم شدہ قانونی حقائق کو مسخ نہیں کر سکتا۔ انہوں نے ‘ایکس’ (سابقہ ٹوئٹر) پر جاری اپنے بیان میں واضح کیا کہ مقبوضہ جموں و کشمیر ایک بین الاقوامی متنازع علاقہ ہے، جس کا حتمی فیصلہ اقوام متحدہ کی سلامتی کونسل کی قراردادوں اور کشمیری عوام کی منشا کے مطابق ہی ہوگا۔ خواجہ آصف نے بھارت کو جنوبی ایشیا میں دہشت گردی اور عدم استحکام کا سب سے بڑا سرپرست قرار دیتے ہوئے کہا کہ بھارتی قیادت کی یہ بیان بازی اپنے اندرونی سیاسی بحران، بے چینی اور نریندر مودی کی تقسیم کارانہ پالیسیوں سے عوام کی توجہ ہٹانے کی ناکام کوشش ہے۔ انہوں نے متنبہ کیا کہ پاکستان امن اور مذاکرات کا حامی ہے، تاہم اپنی خودمختاری اور علاقائی سالمیت کے دفاع کے لیے اس کے عزم کو ہرگز نہ آزمایا جائے۔