کراچی میں نومبر کے دوران 88 کروڑ گیلن پانی کی کمی، واٹر کارپوریشن کی رپورٹ

کراچی واٹر کارپوریشن نے نومبر میں پانی کی فراہمی میں شدید کمی اور بجلی کی مسلسل بندش سے متعلق اعدادوشمار جاری کر دیے۔ رپورٹ کے مطابق شہر میں رواں ماہ مجموعی طور پر 88 کروڑ گیلن پانی کی قلت ریکارڈ کی گئی۔

ترجمان کے مطابق دھابیجی پمپنگ اسٹیشن پر 132 گھنٹے 20 منٹ کی بجلی معطلی کے باعث 42 کروڑ گیلن پانی کم فراہم ہوا۔ ڈملوٹی پمپنگ اسٹیشن پر 146 گھنٹے کی بجلی بندش سے مزید 11 کروڑ 10 لاکھ گیلن پانی متاثر ہوا۔

رپورٹ میں بتایا گیا کہ نارتھ ایسٹ کراچی پمپنگ اسٹیشن میں 33 کروڑ 50 لاکھ گیلن جبکہ حب اور پپری پمپنگ اسٹیشنز میں مجموعی طور پر 66 لاکھ گیلن پانی کی کمی ریکارڈ ہوئی۔ گھارو پمپنگ اسٹیشن پر بھی 20 لاکھ گیلن کی قلت سامنے آئی۔

ترجمان واٹر کارپوریشن نے کہا کہ بجلی کی مسلسل غیر اعلانیہ بندش کے باعث مرکزی پمپنگ اسٹیشنز کے آپریشن بارہا متاثر ہوئے۔ ادارے نے مطالبہ کیا کہ پمپنگ اسٹیشنز کو مستقل اور مستحکم بجلی فراہمی یقینی بنائی جائے اور کیبل فالٹس سے پمپنگ مشینری کو پہنچنے والے نقصانات کا فوری نوٹس لیا جائے۔