کراچی: سائٹ انڈسٹریل ایریا کی صنعتوں کو پانی کی فراہمی معطل، فیکٹریاں بند

کراچی: سائٹ انڈسٹریل ایریا کی صنعتوں کو پانی کی فراہمی بند ہونے کے باعث فیکٹریاں مکمل طور پر بند ہو گئی ہیں، جس سے صنعتی سرگرمیاں ٹھپ ہو کر رہ گئی ہیں

صدر سائٹ ایسوسی ایشن احمد عظیم علوی کے مطابق جمعہ کی شام سے پانی کی سپلائی معطل ہے جس کے باعث صنعتی پیداوار مکمل طور پر رک چکی ہے۔ انہوں نے کہا کہ ملک کو سب سے زیادہ ریونیو دینے والے شہر کی صنعتیں پانی نہ ہونے کی وجہ سے بند پڑی ہیں۔ان کا کہنا تھا کہ صنعتوں کی بندش سے پاکستان کو ناقابلِ تلافی معاشی نقصان کا خدشہ ہے اور اگر فوری طور پر پانی بحال نہ کیا گیا تو پیداواری سرگرمیاں دوبارہ شروع نہیں ہو سکیں گی۔احمد عظیم علوی نے خبردار کیا کہ سائٹ کی صنعتیں لاکھوں مزدوروں کے روزگار کا ذریعہ ہیں اور پانی کی عدم فراہمی سے بے روزگاری میں اضافہ ہو سکتا ہے۔ انہوں نے وزیراعلیٰ سندھ سے فوری نوٹس لینے اور صنعتی پانی کی فراہمی بحال کرنے کا مطالبہ کیا۔انہوں نے میئر کراچی اور ایم ڈی واٹر بورڈ سے بھی مطالبہ کیا کہ صنعتوں کو پانی کی فراہمی یقینی بنائی جائے کیونکہ صرف واٹر سیوریج کارپوریشن صنعتوں کی ضروریات پوری نہیں کر سکتی۔صدر سائٹ ایسوسی ایشن کا کہنا تھا کہ سب سوائل کے مسائل حل کیے بغیر صنعتیں نہیں چل سکتیں۔ انہوں نے مزید کہا کہ کراچی میں پانی، بجلی اور گیس پہلے ہی سب سے مہنگی ہیں، صنعتی پانی کے نرخوں میں مزید اضافہ صنعتوں کے لیے تباہ کن ثابت ہوگا۔ان کا کہنا تھا کہ اب فیصلہ کرنا ہوگا کہ صنعتیں چلانی ہیں یا بند کرنی ہیں، یا تو لاگت کم کی جائے یا پھر صنعتوں کی بندش کا اعلان کر دیا جائے۔