شرجیل میمن کی عالمی بینک سے کراچی سرکلر ریلوے اور ہائی اسپیڈ ٹرین منصوبوں کیلئے تعاون کی درخواست

سندھ کے سینئر وزیر شرجیل انعام میمن نے عالمی بینک سے کراچی سرکلر ریلوے اور کراچی تا سکھر ہائی اسپیڈ ٹرین منصوبوں کیلئے تعاون کی اپیل کی ہے۔

کراچی میں عالمی بینک کے وفد نے شرجیل میمن سے ملاقات کی، جس میں صوبے میں اربن موبیلٹی میں بہتری، ٹرانسپورٹ سسٹم کو مضبوط بنانے اور مختلف ماڈلز پر تفصیلی تبادلۂ خیال ہوا۔

شرجیل انعام میمن کا کہنا تھا کہ کراچی سرکلر ریلوے اور کراچی تا سکھر ہائی اسپیڈ ٹرین سندھ کے لیے گیم چینجر ثابت ہوں گے۔ انہوں نے مزید کہا کہ یلو لائن بی آر ٹی سے متعلق فیصلے عوامی مفاد کو مدنظر رکھتے ہوئے کیے گئے ہیں، جبکہ منصوبے کی بروقت تکمیل کیلئے عالمی بینک کے مزید تعاون کی ضرورت ہے۔

سینیئر وزیر نے بتایا کہ حالیہ سال وفاقی حکومت نے گرین لائن بی آر ٹی سندھ کے حوالے کی ہے، جس کے بعد صوبائی انتظام میں اس کی یومیہ رائڈرشپ میں 33 ہزار تک اضافہ ریکارڈ کیا گیا ہے۔