کے ٹو ائیرویز طیارہ حادثہ؛ اورماڑہ کے قریب گہرے سمندر میں ریسکیو آپریشن تیز، لاپتہ عملے کی تلاش جاری

کے ٹو ائیرویز کے کارگو طیارے کے المناک حادثے کے بعد گہرے سمندر میں سرچ اینڈ ریسکیو آپریشن بدستور جاری ہے، جس میں پاکستان نیوی اور پاکستان میرین سیکیورٹی ایجنسی (PMSA) کے بحری جہاز لاپتہ عملے کی تلاش میں دن رات مصروف ہیں۔ ترجمان پاکستان ایئر پورٹس اتھارٹی (PAA) کے مطابق، بلوچستان کے ساحلی علاقے اورماڑہ کے قریب طیارے کا ملبہ ملنے کے بعد متعلقہ سمندری حدود کی تفصیلی اسکیننگ کا عمل مزید تیز کر دیا گیا ہے۔ جدید آلات کی مدد سے سمندر کی تہہ کا جائزہ لیتے ہوئے تباہ شدہ طیارے کے مزید اہم پرزے اور ملبہ بھی برآمد کر لیا گیا ہے۔ حکام کا کہنا ہے کہ سمندر سے نکالا جانے والا تمام ملبہ اور پرزے طیارہ حادثے کی وجوہات جاننے کے لیے قائم کردہ اعلیٰ سطحی تحقیقاتی ٹیم کے حوالے کیے جائیں گے تاکہ تکنیکی تجزیے (Technical Analysis) کے ذریعے حادثے کی اصل وجوہات کا سراغ لگایا جا سکے۔