پاکستان اور چین کا ٹرانسپورٹ و بندرگاہی شعبے میں تعاون مزید وسعت دینے پر اتفاق

وفاقی وزیر برائے بحری امور جنید انوار چودھری نے بیجنگ میں چائنا ریلوے الیکٹریفکیشن انجینئرنگ گروپ کمپنی کے نائب صدر لی لی (Li Li) سے ایک اہم ملاقات کی، جس میں ٹرانسپورٹ، بندرگاہی انفراسٹرکچر اور پاکستان میں سرمایہ کاری کے فروغ پر تفصیلی تبادلہ خیال کیا گیا۔

ملاقات کے دوران وفاقی وزیر جنید انوار چودھری نے کہا کہ پاکستان چین کے ساتھ ٹرانسپورٹ کے شعبے میں تعاون کو مزید مضبوط بنانے کا خواہاں ہے، کیونکہ ایک جدید ٹرانسپورٹ نیٹ ورک قومی معیشت کی استواری میں کلیدی کردار ادا کرتا ہے۔ انہوں نے زور دیا کہ پاکستانی بندرگاہوں کو جدید خطوط پر استوار کرنا حکومت کی اولین ترجیح ہے اور پائیدار انفراسٹرکچر کے قیام کے ذریعے علاقائی تجارت کو فروغ دیا جائے گا۔

وفاقی وزیر نے یقین دہانی کرائی کہ حکومتِ پاکستان چینی سرمایہ کاروں کو ہر ممکن سہولیات اور بہترین مواقع فراہم کرنے کے لیے پُرعزم ہے۔ انہوں نے مزید کہا کہ پاک چین باہمی تعاون سے بندرگاہی شعبہ ترقی کی نئی منزلیں طے کرے گا اور بندرگاہوں کو اقتصادی راہداریوں سے مؤثر انداز میں جوڑ کر تجارتی سرگرمیوں میں اضافہ کیا جائے گا۔ اس موقع پر چائنا ریلوے الیکٹریفکیشن انجینئرنگ گروپ کے نائب صدر لی لی نے پاکستان میں سرمایہ کاری کی بہترین فضا کی تعریف کی اور اپنے ادارے کی جانب سے پاکستان کے انفراسٹرکچر اور ٹرانسپورٹ کے منصوبوں میں تعاون کو مزید وسعت دینے کے لیے گہری دلچسپی کا اظہار کیا۔