جے یو آئی اسلام آباد کے امیر مفتی اویس عزیز گرفتار: حکومت اوچھے ہتھکنڈوں پر اتر آئی ہے، ترجمان

جمعیت علمائے اسلام (جے یو آئی) اسلام آباد کے امیر مفتی اویس عزیز کو پولیس نے گرفتار کر لیا ہے، جس پر پارٹی کی جانب سے شدید ردِعمل سامنے آیا ہے۔ جے یو آئی کے مرکزی ترجمان اسلم غوری نے مفتی اویس عزیز کی گرفتاری کی سخت الفاظ میں مذمت کرتے ہوئے کہا ہے کہ حکومت اوچھے ہتھکنڈوں پر اتر آئی ہے، لیکن آئین اور قانون کے احترام کو ہماری کمزوری نہ سمجھا جائے۔ ترجمان نے کہا کہ جے یو آئی قائدین اور کارکنوں پر حکومتی جبر و دہشت گردی کا بھرپور مقابلہ کیا جائے گا اور مطالبہ کیا کہ مفتی اویس عزیز کو فی الفور رہا کیا جائے۔ اسلم غوری نے کارکنوں کو ہدایت کی ہے کہ وہ اشتعال میں نہ آئیں اور نظم و ضبط قائم رکھتے ہوئے قیادت کے اگلے حکم کا انتظار کریں۔