جناح ہاؤس حملہ کیس: سوشل میڈیا ایکٹوسٹ فلک جاوید کی درخواستِ ضمانت پر سماعت 16 نومبر تک ملتوی

انسدادِ دہشت گردی عدالت لاہور کے جج منظر علی گل نے جناح ہاؤس حملہ کیس میں نامزد سوشل میڈیا ایکٹوسٹ فلک جاوید کی بعد از گرفتاری درخواستِ ضمانت پر سماعت 16 نومبر تک ملتوی کر دی ہے۔ سماعت کے دوران فلک جاوید کے وکیل دلائل کے لیے پیش نہ ہو سکے، جبکہ پراسکیوشن نے مقدمے کا حتمی ریکارڈ پیش کرنے کے لیے عدالت سے مہلت طلب کی۔ عدالت نے پراسکیوشن کو آئندہ سماعت پر ریکارڈ پیش کرنے اور ملزمہ کے وکیل کو دلائل مکمل کرنے کی ہدایت جاری کی ہے۔ جیل سے دائر درخواست میں وکیلِ صفائی کا موقف ہے کہ ملزمہ بے گناہ ہے اور اسے تین سال کی تاخیر سے مقدمے میں گرفتار کیا گیا ہے، لہٰذا ضمانت پر رہا کیا جائے۔ دوسری جانب تفتیشی افسر کے مطابق تھانہ سرور روڈ میں درج مقدمہ نمبر 96/23 میں بغاوت سمیت دیگر سنگین دفعات شامل ہیں اور ملزمہ جناح ہاؤس پر حملے اور جلاؤ گھیراؤ کی سازش میں ملوث ہے۔