آبنائے ہرمز بند رہی تو 3 ہفتوں میں جیٹ فیول کی شدید قلت پیدا ہونے کا امکان ہے

آبنائے ہرمز کی بندش کے باعث عالمی سطح پر طیاروں کے ایندھن کے بحران کا خدشہ شدت اختیار کر گیا ہے، جبکہ فضائی سفر کے کرایوں میں اضافے کے امکانات بھی بڑھ گئے ہیں۔

عالمی خبر رساں ادارے کی رپورٹ کے مطابق یورپی ہوائی اڈوں کی تنظیم نے یورپی حکام کو ایک اہم خط ارسال کیا ہے جس میں خبردار کیا گیا ہے کہ اگر آئندہ تین ہفتوں کے دوران آبنائے ہرمز بحال نہ ہوئی تو یورپ کو طیارہ ایندھن کی شدید قلت کا سامنا کرنا پڑ سکتا ہے۔

خط میں کہا گیا ہے کہ آبنائے ہرمز کے ذریعے تیل اور ایندھن کی ترسیل معطل رہنے سے ہوائی اڈوں کی سرگرمیاں اور فضائی رابطے متاثر ہو سکتے ہیں۔ تنظیم کے مطابق یورپی ہوائی اڈوں کے درمیان ایندھن کی دستیابی کے حوالے سے شدید تشویش پائی جا رہی ہے۔

رپورٹ میں بتایا گیا ہے کہ خلیجی خطہ یورپ کے لیے طیارہ ایندھن کی فراہمی کا ایک بڑا ذریعہ ہے اور تقریباً نصف درآمدات اسی خطے سے ہوتی ہیں۔ اگر یہ سلسلہ متاثر رہا تو اس کے اثرات یورپ کی معیشت اور متاثرہ علاقوں پر بھی مرتب ہوں گے۔

ادھر ایندھن کی ممکنہ کمی کے پیش نظر کئی فضائی کمپنیوں نے پروازوں میں کمی کر دی ہے، جبکہ ٹکٹوں کی قیمتوں میں اضافے کا رجحان بھی سامنے آ رہا ہے۔