برطانوی ایئربیس سے بی ون بمبار طیارے احتیاطی طور پر واپس بلائے: جے ڈی وینس

امریکی نائب صدر جے ڈی وینس (JD Vance) نے تصدیق کی ہے کہ امریکا نے برطانیہ کے ‘آر اے ایف فیئر فورڈ’ (RAF Fairford) ایئربیس سے اپنے بی ون (B-1) بمبار طیارے احتیاطی تدابیر کے تحت واپس بلا لیے ہیں۔ نائب صدر کے مطابق یہ فیصلہ برطانوی اڈے پر موجود امریکی اہلکاروں اور اثاثوں کو ممکنہ خطرات سے محفوظ رکھنے کے لیے کیا گیا ہے۔ واضح رہے کہ یہ بمبار طیارے حالیہ دنوں میں ایران کے خلاف امریکی ملٹری آپریشنز میں استعمال کیے جا رہے تھے۔

یہ اہم پیش رفت ایک ایسے وقت میں سامنے آئی ہے جب گزشتہ ہفتے ہی اس ایئربیس کے قریب پانچ برطانوی شہریوں کو مبینہ دہشت گردانہ کارروائی کی تیاری کے شبے میں گرفتار کیا گیا تھا، جبکہ بعد میں ایک برطانوی ایرانی شہری کو بھی حراست میں لیا گیا، تاہم تمام مشتبہ افراد کو فی الوقت ضمانت پر رہا کر دیا گیا ہے۔ نیٹو کے فوجی ذرائع کا کہنا ہے کہ برطانیہ میں قائم امریکی تنصیبات کو ایران کی جانب سے شدید سیکیورٹی خطرات لاحق ہیں، جب کہ دوسری جانب تہران نے ایئربیس پر کسی بھی قسم کی تخریبی سازش میں ملوث ہونے کے تمام الزامات کو مکمل طور پر بے بنیاد قرار دے کر مسترد کر دیا ہے۔