مصر، سوڈان اور اعلیٰ امریکی حکام کے سوڈان جنگ کے خاتمے کیلئے اہم مذاکرات

مصر، سوڈان اور امریکہ کے اعلیٰ حکام کے درمیان سوڈان میں جاری شدید جنگ اور کشیدگی کے خاتمے، امن و سیکیورٹی کی بحالی اور ملک میں ایک پائیدار سیاسی حل کی راہ ہموار کرنے کے لیے اہم سہ فریقی مذاکرات منعقد ہوئے ہیں۔ مصری وزارتِ خارجہ کے مطابق وزیرِ خارجہ بدر عبدالعاطی نے اپنے سوڈانی ہم منصب محی الدین سالم اور امریکی صدر کے عرب و افریقی امور کے سینئر مشیر مسعد بولس (Massad Boulos) سے اہم ملاقات کی، جہاں خطے کی تازہ ترین صورتحال کا جائزہ لیا گیا۔

یہ اہم ڈپلومیٹک مشاورت ایک ایسے وقت میں ہوئی ہے جب علاقائی اور عالمی طاقتیں سوڈان میں جاری خانہ جنگی کو روکنے اور دیرپا سیاسی تصفیے کے لیے اپنی سفارتی کوششیں تیز کر رہی ہیں۔ مذاکرات کے دوران جنگ بندی کی جاری کوششوں کو مزید موثر بنانے اور ایسے سازگار حالات پیدا کرنے پر غور کیا گیا جن کے نتیجے میں سوڈانی عوام کی امنگوں کے مطابق حل نکل سکے۔ مصری وزیرِ خارجہ بدر عبدالعاطی نے گفتگو کرتے ہوئے سوڈان کی قومی سلامتی، خودمختاری، علاقائی سالمیت اور ریاستی اداروں کے تحفظ کو ناگزیر قرار دیا۔