اٹلی: سکولوں میں نقاب پر پابندی، غیر ملکی طلبہ کی حد مقرر کا اعلان

اٹلی کی وزیراعظم جارجیا میلونی (Giorgia Meloni) نے اعلان کیا ہے کہ ان کی حکومت تعلیمی اداروں میں برقع اور چہرے کے نقاب پر پابندی عائد کرنے اور ہر کلاس میں غیر ملکی طلبہ کی حد مقرر کرنے کے لیے جلد ایک بل کابینہ میں پیش کرنے جا رہی ہے۔ اپنی سیاسی جماعت ‘برادرز آف اٹلی’ کی یوتھ ونگ سے خطاب کرتے ہوئے انہوں نے کہا کہ جو بھی اٹلی میں اپنا مستقبل بنانا چاہتا ہے، اسے ہماری زبان اور ثقافت کا احترام کرنا ہوگا۔ انہوں نے مزید کہا کہ اٹلی کے اسکولوں میں ہر طالب علم کو چہرہ کھلا رکھنا ہوگا اور کسی کو بھی روایات کے نام پر نوجوان خواتین کو اپنا چہرہ چھپانے پر مجبور کرنے کی اجازت نہیں دی جا سکتی۔

مجوزہ قانون سازی کے تحت ان غیر ملکی طلبہ کے والدین کے لیے بھی اطالوی زبان سیکھنا لازمی قرار دیا جائے گا جن کے بچوں کو اسکول سسٹم میں ڈھلنے میں شدید دشواری کا سامنا ہے۔ وزیراعظم کا کہنا تھا کہ اگر کلاس میں صرف ایک غیر ملکی بچہ ہو تو وہ دیگر طلبہ اور اساتذہ کی مدد سے زبان سیکھ کر تیزی سے معاشرے میں ضم ہو سکتا ہے، لیکن غیر ملکی بچوں کی اکثریت ہو جائے تو یہ انضمام نہیں بلکہ غفلت ہے۔ واضح رہے کہ تحقیقی ادارے ‘فونڈازیونے آئی ایس ایم یو’ کے مطابق اطالوی اسکولوں میں زیرِ تعلیم طلبہ میں 11.6 فیصد غیر اطالوی شہری ہیں، اور بحیرہ روم میں واقع ہونے کے باعث تارکینِ وطن کی آمد کا معاملہ اٹلی میں ہمیشہ سے ایک اہم سیاسی موضوع رہا ہے۔