پاکستان اور کینیڈا کے تعلقات میں نیا سنگِ میل، اقتصادی تعاون بڑھانے پر اتفاق

نائب وزیر اعظم و وزیر خارجہ اسحاق ڈار نے اسلام آباد میں کینیڈین وزیر خارجہ انیتا آنند کے ہمراہ مشترکہ پریس کانفرنس کرتے ہوئے کہا ہے کہ کینیڈین وزیر خارجہ کا دورہ پاکستان دوطرفہ تعلقات میں اہم سنگِ میل ثابت ہوگا۔ انہوں نے بتایا کہ پاکستان اور کینیڈا کے درمیان زراعت کے شعبے میں جلد نئے پروٹوکول اور سرمایہ کاری کے تحفظ کے معاہدے پر دستخط کیے جائیں گے۔ اس موقع پر کینیڈین وزیر خارجہ انیتا آنند نے پاکستان میں 45 ملین ڈالر مالیت کے 3 نئے ترقیاتی منصوبوں اور 22 لاکھ ڈالر سے زائد کے نئے سیکیورٹی اقدامات کا اعلان کیا، جو انٹرپول اور اقوام متحدہ کے تعاون سے مکمل کیے جائیں گے۔ انہوں نے پاکستان کے ساتھ زرعی تجارتی تعلقات بالخصوص کینولا، چنے اور دالوں کی برآمدات بڑھانے میں دلچسپی کا اظہار کیا اور مشرقِ وسطیٰ و ایران سے متعلق سفارتی مذاکرات میں پاکستان کے مثبت کردار کی تعریف کی۔