الخلیل میں اسرائیلی آباد کاروں کا فلسطینیوں پر حملہ، گاڑی نذر آتش

مقبوضہ مغربی کنارے کے شہر الخلیل (ہیبرون) میں جنونی اسرائیلی آباد کاروں نے فلسطینی شہریوں کے گھروں پر دھاوا بول کر توڑ پھوڑ کی اور شدید اشتعال انگیزی پھیلاتے ہوئے ایک شہری کی گاڑی کو نذرِ آتش کر دیا۔ عالمی خبر ایجنسی کے مطابق، مسلح آباد کاروں کے ایک گروپ نے الخلیل کے رہائشی علاقے میں واقع 2 فلسطینی گھروں پر بزدلانہ حملہ کیا اور وہاں موجود بے بس خواتین اور بچوں کو تشدد کا نشانہ بنایا۔

حملے کے دوران حملہ آوروں نے ایک معصوم فلسطینی بچے کو اغوا کرنے کی کوشش بھی کی، تاہم مقامی رہائشیوں نے بے مثال شجاعت کا مظاہرہ کرتے ہوئے بروقت مداخلت کی اور بچے کو اغوا کاروں کے چنگل سے چھڑا لیا۔ اس دل دہلا دینے والے واقعے کے بعد پورے علاقے میں شدید کشیدگی اور خوف و ہراس پھیل گیا ہے، جبکہ فلسطینی عوام نے عالمی برادری سے اسرائیلی آباد کاروں کی بڑھتی ہوئی غنڈہ گردی اور تشدد کا فوری نوٹس لینے کا مطالبہ کیا ہے۔