امریکی دباؤ نظر انداز: اسرائیل کی جنوبی لبنان میں بمباری، 4 افراد شہید

اسرائیلی فورسز نے امریکی دباؤ کو مکمل طور پر نظر انداز کرتے ہوئے جنوبی لبنان کے ضلع نبطیہ میں شدید بمباری کی ہے، جس کے نتیجے میں متعدد مقامات کو نشانہ بنایا گیا اور 4 افراد شہید جبکہ کئی زخمی ہو گئے۔

بین الاقوامی خبر رساں ایجنسی کے مطابق، اسرائیلی فورسز نے فضائی حملوں کے ساتھ ساتھ توپ خانے سے بھی شدید گولہ باری کی، جبکہ میفدون کے علاقے میں 3 تباہ کن ڈرون حملے کیے گئے۔ واضح رہے کہ دو مارچ سے جاری ان ہولناک اسرائیلی حملوں میں اب تک شہدا کی مجموعی تعداد 3 ہزار 8 سو 26 تک پہنچ چکی ہے، جن میں سیکڑوں معصوم خواتین اور بچے بھی شامل ہیں۔

رپورٹ کے مطابق، جنوبی لبنان میں جاری اس شدید جارحیت کے باعث اب تک تقریباً 10 لاکھ کے قریب افراد اپنے گھر بار چھوڑ کر محفوظ مقامات پر منتقل ہونے اور نقل مکانی پر مجبور ہو چکے ہیں۔ دوسری جانب، اسرائیلی فوج نے روایتی دعویٰ کیا ہے کہ انہوں نے حزب اللہ کی طرف سے کیے جانے والے راکٹ حملے ناکام بنا دیے ہیں اور ان کے متعدد راکٹ لانچرز کو تباہ کر دیا ہے۔