اسرائیلی فوج جنوبی شام کے بفر زون میں داخل، مزاحمت پر متعدد شامی شہری شہید

اسرائیلی افواج بین الاقوامی قوانین کی کھلی خلاف ورزی کرتے ہوئے جنوبی شام کے بفر زون (حائل علاقے) میں داخل ہو گئی ہیں، جہاں مقامی آبادی کی جانب سے شدید مزاحمت پر متعدد شامی شہری شہید ہو گئے ہیں۔

بین الاقوامی خبر رساں ایجنسی کے مطابق، اسرائیلی فورسز کی جارحیت اور فائرنگ کے نتیجے میں کئی شامی شہری شدید زخمی بھی ہوئے ہیں۔ دوسری جانب، روایتی ہتھکنڈے اپناتے ہوئے اسرائیلی فوج نے دعویٰ کیا ہے کہ یہ کارروائی علاقے سے “خطرات کا خاتمہ” کرنے کے لیے کی گئی ہے۔

اسرائیل اس وقت شام کے 235 مربع کلومیٹر علاقے پر ناجائز قابض ہے۔ شامی علاقے درعا میں اسرائیلی فوج مسلسل آگے بڑھ رہی ہے جہاں انہوں نے ایک نئی فوجی چیک پوسٹ قائم کر دی ہے۔ علاوہ ازیں، سیکیورٹی ذرائع نے تصدیق کی ہے کہ سریہ جملہ کے قریبی علاقے میں بھی اسرائیل کی جانب سے دوسری چیک پوسٹ قائم کر دی گئی ہے تاکہ علاقے پر کنٹرول کو مضبوط کیا جا سکے۔ شام کے جنوبی سرحدی علاقوں میں اسرائیلی فوج کی اس تازہ پیش قدمی اور نئی چیک پوسٹس کے قیام کے بعد خطے میں کشیدگی شدید تر ہو گئی ہے۔