اسلام آباد میں مارکیٹیں اور تجارتی مراکز رات 8 بجے بند کرنے کا حکم ، نوٹیفکیشن جاری

اسلام آباد: وفاقی دارالحکومت میں توانائی کے مؤثر استعمال اور کاروباری اوقات کار کو منظم بنانے کے لیے مارکیٹوں اور تجارتی مراکز کو رات 8 بجے بند کرنے کا نوٹیفکیشن جاری کر دیا گیا ہے۔

جاری کردہ نوٹیفکیشن کے مطابق نئی پابندیاں یکم جون 2026 سے نافذ العمل ہو گئی ہیں، جس کے تحت اسلام آباد کی تمام مارکیٹیں اور بڑے تجارتی مراکز رات 8 بجے بند کیے جائیں گے۔

نوٹیفکیشن میں کہا گیا ہے کہ فارمیسیاں، اسپتال اور ادویات کی دکانیں ان پابندیوں سے مستثنیٰ ہوں گی، جبکہ پیٹرول پمپ اور گیس اسٹیشن معمول کے مطابق اپنے اوقات کار جاری رکھ سکیں گے۔

مزید بتایا گیا ہے کہ کھانے پینے کے مراکز، روٹی کے تنور، کریانہ اسٹورز، سبزی و پھل فروش اور بیکریاں رات 10 بجے تک کھلی رہ سکیں گی، جس کے بعد انہیں بھی بند کرنا ہوگا۔

حکام کے مطابق شادی ہالز اور تقریبات کے لیے استعمال ہونے والی مارکیز کو بھی رات 10 بجے بند کرنے کی ہدایت جاری کر دی گئی ہے۔