نئے لوکل گورنمنٹ آرڈیننس کے بعد اسلام آباد کے بلدیاتی انتخابات ملتوی

الیکشن کمیشن آف پاکستان نے نئے لوکل گورنمنٹ ترمیمی آرڈیننس کے نفاذ کے بعد اسلام آباد میں بلدیاتی انتخابات کا شیڈول واپس لے لیا ہے، جس کے نتیجے میں بلدیاتی انتخابات ایک بار پھر غیر معینہ مدت کے لیے ملتوی ہو گئے ہیں۔

ذرائع کے مطابق اسلام آباد میں بلدیاتی انتخابات کے لیے پولنگ 15 فروری کو شیڈول تھی، تاہم 10 جنوری کو حکومت کی جانب سے نیا آرڈیننس جاری ہونے کے بعد سابقہ قانون غیر مؤثر ہو گیا۔ الیکشن کمیشن کا کہنا ہے کہ وہ نئے قانون کے تحت ہی انتخابات کرانے کا مجاز ہے۔

اسلام آباد میں مقامی حکومتوں کی آئینی مدت فروری 2021 میں ختم ہو چکی ہے، جبکہ گزشتہ چار برسوں کے دوران انتخابات کے انعقاد میں مسلسل تاخیر دیکھنے میں آئی ہے۔ الیکشن کمیشن اب تک تین بار انتخابی شیڈول اور پانچ مرتبہ حلقہ بندیاں جاری کر چکا ہے، اور اب چھٹی بار حلقہ بندیاں ناگزیر ہو گئی ہیں۔