رینجرز اہلکاروں کی شہادت کا کیس؛ مرکزی ملزم ہاشم عباسی کا ذہنی توازن درست قرار

اسلام آباد کی انسدادِ دہشت گردی عدالت (ATC) میں 26 نومبر کو پاکستان تحریکِ انصاف (پی ٹی آئی) کے احتجاج کے دوران 4 رینجرز اہلکاروں کی شہادت کے کیس میں اہم پیش رفت سامنے آئی ہے، جہاں عدالت نے کیس کے مرکزی ملزم ہاشم عباسی کا ذہنی توازن درست قرار دیتے ہوئے ان کے خلاف باقاعدہ ٹرائل شروع کرنے کا فیصلہ کیا ہے۔ میڈیکل بورڈ کی جانب سے عدالت میں پیش کی گئی رپورٹ کے مطابق ملزم کو کوئی ذہنی بیماری لاحق نہیں، بلکہ صرف معمولی انزائٹی (اضطراب) ہے۔ واضح رہے کہ میڈیکل رپورٹ کی عدم دستیابی کے باعث گزشتہ 8 ماہ سے کیس میں کوئی اہم پیش رفت نہیں ہو سکی تھی، جس پر عدالت نے دسمبر 2025 میں میڈیکل بورڈ کو رپورٹ پیش کرنے کا حکم دیا تھا۔ ملزم ہاشم عباسی پر رینجرز اہلکاروں کو گاڑی کے نیچے کچل کر شہید کرنے کا سنگین الزام ہے، جبکہ اس مقدمے میں بانی پی ٹی آئی، بشریٰ بی بی اور علی امین گنڈاپور سمیت دیگر رہنما بھی نامزد ہیں۔ عدالت نے ملزم کا ذہنی توازن درست قرار پانے پر استغاثہ کے گواہان کو طلب کرتے ہوئے کیس کی سماعت کل تک کے لیے ملتوی کر دی ہے۔