اسحاق ڈار اور سری لنکن وزیر خارجہ کی ملاقات، دوطرفہ تعلقات مضبوط بنانے پر اتفاق

نائب وزیراعظم و وزیر خارجہ سینیٹر محمد اسحاق ڈار نے فلپائن کے دارالحکومت منیلا میں آسیان ریجنل فورم کے موقع پر سری لنکا کے وزیر خارجہ وجیتھا ہیراتھ سے اہم ملاقات کی ہے۔ دفتر خارجہ کے ترجمان کے مطابق ملاقات میں دونوں رہنماؤں نے پاکستان اور سری لنکا کے درمیان تاریخی، قریبی اور دوستانہ تعلقات کا اعادہ کرتے ہوئے باہمی تعاون کو مزید وسعت دینے کے عزم کا اظہار کیا۔

ملاقات میں تجارت، اقتصادی روابط، دفاعی تعاون اور عوامی سطح پر رابطوں کو فروغ دینے کے مختلف پہلوؤں پر تفصیلی تبادلہ خیال کیا گیا۔ دونوں وزرائے خارجہ نے پاکستان اور سری لنکا کے درمیان ادارہ جاتی روابط میں ہونے والی مثبت پیش رفت کو سراہا، جبکہ پاکستانی کرکٹ ٹیم کے حالیہ کامیاب دورۂ سری لنکا کو دونوں ممالک کے درمیان عوام دشمنی اور دوستی کے فروغ کے لیے خوش آئند قرار دیا۔

سینیٹر اسحاق ڈار اور وجیتھا ہیراتھ نے دوطرفہ تعلقات کو مزید مستحکم کرنے کی خاطر اعلیٰ سطح کے وفود کے تبادلوں کا سلسلہ جاری رکھنے پر اتفاق کیا۔ اس موقع پر سری لنکن وزیر خارجہ نے خطے میں امن، استحکام اور مکالمے کے فروغ میں پاکستان کے تعمیری کردار کی تعریف کی۔ ملاقات کے دوران اس بات پر اتفاق کیا گیا کہ حالیہ علاقائی کشیدگی کو مذاکرات اور سفارت کاری کے ذریعے حل کیا جانا چاہیے تاکہ افہام و تفہیم کے ساتھ خطے میں دیرپا امن اور استحکام کو یقینی بنایا جا سکے۔