پاکستان اور مصر کا علاقائی چیلنجز کے حل کیلئے مذاکرات اور سفارتکاری کی اہمیت پر زور

نائب وزیراعظم و وزیرِ خارجہ اسحاق ڈار نے نیویارک میں اقوامِ متحدہ کی جنرل اسمبلی کے 81 ویں اجلاس کے سائیڈ لائنز پر مصری وزیرِ خارجہ ڈاکٹر بدر عبدالعاطی سے اہم ملاقات کی۔ ملاقات کے دوران پاکستان اور مصر کے درمیان دیرینہ برادرانہ اور تاریخی تعلقات کو مزید تقویت دینے کے عزم کا اعادہ کیا گیا۔ دونوں وزرائے خارجہ نے باہمی دلچسپی کے شعبوں بشمول تجارت، سرمایہ کاری، معاشی تعاون، تعلیم، ثقافتی تبادلوں اور عوامی سطح پر روابط کو مزید وسعت دینے پر اتفاق کیا۔

ملاقات میں مشرقِ وسطیٰ اور ایران کی صورتحال سمیت اہم علاقائی اور عالمی مسائل پر تفصیلی تبادلۂ خیال ہوا، جس میں دونوں رہنماؤں نے تمام تر چیلنجز کے حل کے لیے مذاکرات اور سفارت کاری کی اہمیت پر زور دیا۔ اس موقع پر نائب وزیراعظم اسحاق ڈار نے ‘اسلام آباد مفاہمتی یادداشت’ (Islamabad MoU) پر تمام فریقین کی جانب سے مکمل عملدرآمد یقینی بنانے کی ضرورت پر زور دیا۔ اس کے علاوہ ‘ریجنل فور’ (R4) فریم ورک کے تحت باقاعدہ مشاورت جاری رکھنے، بین الاقوامی تعاون کو فروغ دینے اور مؤثر کثیرالجہتی نظام کے ذریعے عالمی چیلنجز سے نمٹنے کے لیے باہمی رابطہ مزید مضبوط کرنے پر اتفاق کیا گیا۔