پاکستان اور کینیڈا کے درمیان ترجیحی شعبوں میں دوطرفہ تعاون بڑھانے پر اتفاق

نائب وزیراعظم اور وزیرِ خارجہ سناتور محمد اسحاق ڈار سے کینیڈا کی وزیرِ خارجہ انیتا آنند نے اسلام آباد میں اہم ملاقات کی، جس کے دوران دوطرفہ تعلقات، علاقائی صورتحال اور عالمی امور پر تفصیلی تبادلہ خیال کیا گیا۔ اس موقع پر دونوں ممالک کے درمیان وفود کی سطح پر مذاکرات ہوئے جس میں زراعت، صنعت اور دیگر ترجیحی شعبوں میں باہمی تعاون کو مزید وسعت دینے پر اتفاق کیا گیا۔ نائب وزیراعظم اسحاق ڈار نے کینیڈین وزیرِ خارجہ کی آمد کا خیرمقدم کرتے ہوئے کہا کہ کینیڈا میں مقیم 3 لاکھ سے زائد پاکستانی برادری دونوں ممالک کا قیمتی اثاثہ ہے اور یہ دورہ دوطرفہ روابط کو نئی رفتار دے گا۔ کینیڈین وزیرِ خارجہ انیتا آنند نے پرتپاک استقبال پر شکریہ ادا کرتے ہوئے کہا کہ کینیڈا پاکستان کے ساتھ تجارتی اور معاشی تعلقات کو فروغ دینے کے لیے مکمل طور پر پرعزم ہے۔