پاکستان اور عمان کے وزرائے خارجہ کی ملاقات، تجارت و سرمایہ کاری بڑھانے پر اتفاق

نائب وزیراعظم اور وزیرِ خارجہ سینیٹر اسحاق ڈار نے فلپائن میں منعقدہ ‘آسیان ریجنل فورم’ کی سائیڈ لائنز پر عمان اور نیوزی لینڈ کے وزرائے خارجہ سے الگ الگ اہم ملاقاتیں کیں، جن میں دوطرفہ تعلقات، تجارت، سرمایہ کاری اور خطے کی مجموعی صورتحال پر تبادلہ خیال کیا گیا۔

ترجمان دفترِ خارجہ کے مطابق سینیٹر اسحاق ڈار نے عمان کے وزیرِ خارجہ سید بدر بن حمد البوسعیدی سے ملاقات کی، جس میں دونوں رہنماؤں نے باہمی تعاون کی مثبت پیش رفت پر اطمینان کا اظہار کیا۔ ملاقات کے دوران اعلیٰ سطح کے وفود کے تبادلوں اور تجارت و سرمایہ کاری کے فروغ پر اتفاق کیا گیا۔ عمانی وزیرِ خارجہ نے خطے میں امن و سلامتی کے قیام اور کشیدگی کم کرنے کے لیے پاکستان کے سفارتی کردار کو سراہا۔ دونوں رہنماؤں نے خطے کی حالیہ صورتحال پر تشویش کا اظہار کرتے ہوئے بین الاقوامی قوانین کے احترام اور جنگ بندی برقرار رکھنے کی ضرورت پر زور دیا۔

بعد ازاں، نائب وزیراعظم نے نیوزی لینڈ کے وزیرِ خارجہ ونسٹن پیٹرز سے بھی ملاقات کی۔ اس موقع پر تجارت، سرمایہ کاری، عوامی روابط اور کھیل کے شعبے میں تعاون بڑھانے پر اتفاق ہوا۔ ترجمان کے مطابق نیوزی لینڈ کے وزیرِ خارجہ نے امریکہ اور ایران کے درمیان کشیدگی میں کمی لانے کے لیے پاکستان کی ثالثی کوششوں اور مذاکراتی کردار کی تعریف کی، جبکہ دونوں جانب سے ادارہ جاتی روابط کو مزید مضبوط بنانے پر اتفاق کیا گیا۔