ایرانی پاسداران انقلاب کا امریکی حملے کا بھرپور جواب دینے کا اعلان

ایرانی پاسداران انقلاب (آئی آر جی سی) نے عزم ظاہر کیا ہے کہ ایران پر امریکی حملے کا جواب ہر حال میں دیا جائے گا اور اس جارحیت کو بغیر کسی ردعمل کے نہیں چھوڑا جائے گا۔ ایرانی خبر رساں ایجنسی کے مطابق، آئی آر جی سی نے اپنے ایک باضابطہ بیان میں دعویٰ کیا ہے کہ اس کی بحری اور فضائی افواج نے سیریک جزیرے پر کیے گئے امریکی حملے کو کامیابی سے ناکام بنا دیا اور اس کے اثرات کو غیر مؤثر کر دیا ہے۔

پاسداران انقلاب نے بیان میں واضح کیا کہ اس امریکی جارحیت کا جواب ضرور دیا جائے گا، تاہم ہمارا یہ ردعمل ہماری اپنی مرضی کے وقت اور مقام پر انتہائی تیز اور فیصلہ کن ہو گا۔ آئی آر جی سی نے امریکا کو سخت انتباہ جاری کرتے ہوئے مزید کہا کہ اگر امریکا نے دوبارہ کوئی نئی احمقانہ حرکت کی تو اسے اس سے بھی زیادہ سخت جواب کا سامنا کرنا پڑے گا۔