پاکستان آرمی کی نگرانی میں عراقی فوج کی اسپیشل فورسز ٹریننگ مکمل

پاکستان آرمی نے عراقی فوج کے دستوں کے لیے 24 ستمبر سے 29 نومبر 2025 تک نیشنل کاؤنٹر ٹیررازم سینٹر (این سی ٹی سی) میں اسپیشل فورسز کی خصوصی تربیت کامیابی سے مکمل کرلی۔

تیسرے بیچ کے 446 تربیت یافتہ جوانوں کی گریجوایشن تقریب 29 نومبر کو منعقد ہوئی، جس میں پاکستان آرمی کے سینئر افسران اور عراق کی مسلح افواج کے نمائندوں نے شرکت کی۔

دونوں ممالک کے جوانوں نے تربیت کے دوران غیر معمولی پیشہ ورانہ مہارت، عملی صلاحیت اور بھرپور عزم کا مظاہرہ کیا۔ تربیتی پروگرام کا مرکز دہشت گردی کے خلاف عملی صلاحیتوں میں اضافہ، ٹیکٹیکل مشقیں، اور مربوط مشن پلاننگ تھا۔
تمام تربیتی اہداف کامیابی سے حاصل کر لیے گئے، جس سے پاکستان اور عراق کے دیرینہ دفاعی تعلقات مزید مضبوط ہوئے اور علاقائی سلامتی و مشترکہ دفاعی تیاری کے حوالے سے دونوں ممالک کے عزم کی ازسرِ نو توثیق ہوئی۔