شہید سپریم لیڈر کی تعزیتی تقریب، ایران کا پاکستان کو خصوصی دعوت نامہ

مجلسِ شوریٰ اسلامی ایران کے اسپیکر محمد باقر قالیباف نے اسپیکر قومی اسمبلی سردار ایاز صادق کے نام ایک خصوصی خط ارسال کرتے ہوئے انہیں ایران کے شہید سپریم لیڈر آیت اللہ سید علی خامنہ ای کی یاد میں منعقد ہونے والی تعزیتی تقریب میں شرکت کی باضابطہ دعوت دی ہے۔

قومی اسمبلی سیکرٹریٹ کی جانب سے جاری کردہ تفصیلات کے مطابق، ایرانی اسپیکر کے خط میں بتایا گیا ہے کہ آیت اللہ سید علی خامنہ ای کی یاد میں یہ تعزیتی تقریب 3 جولائی 2026 کو تہران میں منعقد ہوگی، جس میں دنیا بھر سے مختلف ممالک کی پارلیمانی شخصیات اور اعلیٰ حکام کی شرکت متوقع ہے۔ ایرانی اسپیکر محمد باقر قالیباف نے سردار ایاز صادق سے اس اہم تقریب میں شرکت کی خصوصی درخواست کرتے ہوئے اسے دونوں برادر ممالک کے درمیان تاریخی تعلقات کی علامت قرار دیا ہے۔

ایرانی اسپیکر نے آیت اللہ سید علی خامنہ ای کی شہادت پر گہرے دکھ اور افسوس کا اظہار کرتے ہوئے کہا کہ ان کی خدمات اور قیادت کو ہمیشہ یاد رکھا جائے گا۔ انہوں نے اپنے خط میں پاکستانی عوام، اسپیکر قومی اسمبلی، اراکینِ پارلیمنٹ اور پاکستان کی اعلیٰ قیادت کے لیے نیک تمناؤں کا اظہار کیا۔ محمد باقر قالیباف نے پاکستان اور ایران کے درمیان موجود اسٹریٹجک شراکت داری، برادرانہ تعلقات اور باہمی احترام کو سراہتے ہوئے دونوں ممالک کے درمیان تعاون کے رشتوں کو مزید مضبوط بنانے کی خواہش کا بھی اظہار کیا۔

دوسری جانب، اسپیکر قومی اسمبلی سردار ایاز صادق نے یہ اہم دعوت نامہ بھیجنے پر ایرانی اسپیکر کا شکریہ ادا کیا اور تعزیتی تقریب میں شرکت کی دعوت پر اظہارِ تشکر کرتے ہوئے پاکستان اور ایران کے دیرینہ برادرانہ تعلقات کو مزید فروغ دینے کے پختہ عزم کا اعادہ کیا۔ پارلیمانی اور سیاسی حلقوں کے مطابق، اس خط اور باضابطہ دعوت کو دونوں ممالک کے درمیان قریبی سفارتی اور پارلیمانی روابط کا ایک اہم اظہار قرار دیا جا رہا ہے، جو پاک ایران باہمی اعتماد، احترام اور خطے میں تعاون کے فروغ میں مثبت اور کلیدی کردار ادا کرے گا۔