ایران مذاکرات کیلئے تیار ہے لیکن طاقت کی زبان قبول نہیں کرے گا، ایرانی صدر

ایرانی صدر مسعود پزشکیان نے امریکہ کو دوٹوک اور واضح پیغام دیتے ہوئے کہا ہے کہ ایران تنازعات کے حل کے لیے مذاکرات کی میز پر آنے کے لیے تیار ہے لیکن کسی بھی صورت طاقت اور دھمکی کی زبان قبول نہیں کرے گا۔ نیویارک میں اقوامِ متحدہ کی جنرل اسمبلی کے اجلاس کے موقع پر میڈیا سے گفتگو کرتے ہوئے ایرانی صدر نے کہا کہ ایران نے کبھی کسی ملک پر پہل کرتے ہوئے حملہ نہیں کیا بلکہ اس کے تمام اقدامات صرف اپنے دفاع اور قومی سلامتی کے تحفظ کے لیے تھے۔ انہوں نے امریکہ کو شدید تنقید کا نشانہ بناتے ہوئے کہا کہ واشنگٹن انتظامیہ جس ملک کو معاشی یا فوجی طور پر تباہ کرنا چاہتی ہے، اس پر پہلے دہشت گردی کا لیبل لگا دیتی ہے۔

صدر مسعود پزشکیان نے مزید کہا کہ اپنے ملک کا دفاع کرنے کے لیے ایران کو کسی سے بھی اجازت لینے کی ضرورت نہیں ہے، تاہم تہران خطے میں مستقل امن و سلامتی قائم کرنے کے لیے تمام ممالک کے ساتھ شراکت داری چاہتا ہے اور اپنے تمام ہمسایہ ممالک کو معاشی و سیاسی طور پر مضبوط دیکھنے کا خواش مند ہے۔ انہوں نے انکشاف کیا کہ ڈونلڈ ٹرمپ کی دھمکی آمیز تقریر سننے کے بعد انہوں نے خود اس کا جواب دینے کا فیصلہ کیا، جس کی وجہ سے انہوں نے اقوامِ متحدہ کے مائیک پر اپنی پہلے سے تیار کردہ تحریری تقریر کے بجائے سخت ردِعمل پر مبنی فی البدیہہ خطاب کیا۔