ایرانی فوج نے دشمن کے اندازے غلط ثابت کر دیئے: صدر مسعود پزشکیان

ایرانی صدر مسعود پزشکیان نے مسلح افواج کی کارکردگی اور قومی یکجہتی کو سراہتے ہوئے کہا ہے کہ ملکی فوج نے اپنی بے مثال مزاحمت سے دشمن کے تمام تر اندازے اور عزائم غلط ثابت کر دیے ہیں۔ایک اہم تقریب سے خطاب کرتے ہوئے ایرانی صدر مسعود پزشکیان نے زور دیا کہ قومی اتحاد ہی خطے میں ایران کے باوقار اور مضبوط مقام کا اصل سبب ہے۔ انہوں نے کہا کہ بیرونی چیلنجز اور بین الاقوامی دباؤ کا مقابلہ کرنے کے لیے قوم کے اندر اتحاد اور یکجہتی کا ہونا ناگزیر ہے۔صدر مسعود پزشکیان کا کہنا تھا کہ آج ایران کو دنیا اور خطے میں ایک مؤثر اور ناقابلِ تسخیر طاقت کے طور پر تسلیم کیا جاتا ہے۔ انہوں نے دشمن قوتوں پر تنقید کرتے ہوئے کہا:”دشمنوں کا یہ خام خیال تھا کہ وہ شدید فوجی اور سیاسی دباؤ کے ذریعے چند ہی دنوں میں اپنے مذموم مقاصد حاصل کر لیں گے، لیکن ہماری غیور افواج نے میدانِ عمل میں ڈٹ کر اور لازوال مزاحمت دکھا کر ان کی تمام پیش گوئیاں اور اندازے خاک میں ملا دیے۔”ایرانی صدر نے اپنے خطاب میں مسلم امہ کے درمیان بڑھتے ہوئے روابط کا ذکر کرتے ہوئے کہا کہ مسلم دنیا میں اتحاد کا جذبہ اب پہلے سے کہیں زیادہ مضبوط ہو رہا ہے۔ انہوں نے خاص طور پر ہمسایہ اور برادر ممالک کا شکریہ ادا کرتے ہوئے کہا کہ پاکستان، عراق اور لبنان سمیت خطے کے کئی ممالک کے عوام اس مشکل وقت میں ایرانی قوم کے ساتھ کھڑے ہیں اور ان کا یہ اظہارِ یکجہتی امتِ مسلمہ کے روشن مستقبل کی نوید ہے۔