امریکا کو جواب دینا ہوگا، مذاکرات چاہتا ہے یا خلل ڈالنا؟ ایرانی صدر

ایرانی صدر مسعود پزشکیان نے ایک انٹرویو کے دوران دوٹوک مؤقف اپناتے ہوئے کہا ہے کہ امریکہ کو واضح کرنا ہوگا کہ آیا وہ حقیقی مذاکرات کے لیے تیار ہے یا صرف ان میں خلل ڈالنا چاہتا ہے، کیونکہ ایران کسی بھی قسم کے دباؤ اور دھمکیوں کے سامنے ہرگز سر نہیں جھکائے گا۔

ایرانی صدر نے اس عزم کا اعادہ کیا کہ ایران ایک ناقابلِ تسخیر ملک ہے اور اس سے طاقت یا جبر کی زبان میں بات نہیں کی جانی چاہیے۔ انہوں نے انتباہ کیا کہ اگر ایران پر کسی بھی قسم کا حملہ کیا گیا تو اس کا انتہائی بھرپور جواب دیا جائے گا اور حملہ آوروں کو اپنا بوریا بستر گول کر کے واپس جانے پر مجبور ہونا پڑے گا۔

آبنائے ہرمز کے حوالے سے بات کرتے ہوئے مسعود پزشکیان کا کہنا تھا کہ اس دیرینہ مسئلے کا حل دھمکیوں یا جبر میں نہیں بلکہ صرف اور صرف منصفانه مذاکرات میں پوشیدہ ہے۔ ایران کی بنیادی خواہش یہ ہے کہ امریکہ ایک بار پھر مفاہمت کی یادداشت (معاہدے) پر واپس آئے اور اس کی مکمل پاسداری کرے۔ انہوں نے سوال اٹھایا کہ جب امریکہ اپنے طے شدہ وعدوں اور باتوں پر ہی عملدرآمد نہیں کرتا، تو محض ملاقاتیں کرنے سے یہ تنازع کیسے حل ہوسکتا ہے؟ ایران کیسے اس بات کا یقین کرے کہ واشنگٹن اپنے وعدوں پر قائم رہنے کی صلاحیت رکھتا ہے؟

صدر پزشکیان نے سخت الفاظ میں کہا کہ جن لوگوں نے ایران کے رہنماؤں اور معصوم اسکول کے بچوں کو شہید کیا ہے، کیا ایران ان کے پاس ذلت کے ساتھ جاکر مذاکرات کی بھیک مانگے گا؟ انہوں نے عزم ظاہر کیا کہ “ہم مر جائیں گے لیکن کبھی بھی ذلت کا طوق اپنے  میں قبول نہیں کریں گے۔”

اسرائیلی قیادت کو ہدفِ تنقید بناتے ہوئے ایرانی صدر نے کہا کہ اسرائیلی وزیراعظم بنیامین نیتن یاہو جو خود غزہ کے محاذ پر کامیابی حاصل نہیں کر سکے اور وہاں شکست سے دوچار ہیں، وہ بھلا ایران میں حکومت کی تبدیلی کا خواب کیسے پورا کر سکتے ہیں۔ مسعود پزشکیان کے مطابق، امریکہ اور اسرائیل یہ خام خیالی پال رہے ہیں کہ وہ شدید دباؤ کے ہتھکنڈوں کے ذریعے ایران کو ختم کر دیں گے، تاہم ایران تمام اندرونی و بیرونی مشکلات پر پوری مضبوطی اور استقامت کے ساتھ قابو پالے گا۔