ایرانی وزیر داخلہ کی وزیر اعظم سے ملاقات، شہباز شریف کا خلیج میں حالیہ کشیدگی پر گہری تشویش کا اظہار

پاکستان کے دورے پر آئے ایرانی وزیرِ داخلہ اسکندر مومنی نے اسلام آباد میں وزیراعظم شہباز شریف سے اہم ملاقات کی، جس میں وزیراعظم نے خلیجی خطے میں بڑھتی ہوئی حالیہ کشیدگی پر شدید تشویش کا اظہار کیا۔ وزیراعظم شہباز شریف نے تمام متعلقہ فریقوں پر زور دیا کہ وہ انتہائی تحمل کا مظاہرہ کریں اور کسی بھی ایسے اقدام سے گریز کریں جو خطے میں مزید عدم استحکام اور بدامنی کا باعث بنے۔ انہوں نے اعادہ کیا کہ پاکستان خطے میں امن و امان کے قیام کے لیے ایک دیانتدار اور مخلص ثالث کا کردار ادا کرتا رہے گا۔ ملاقات کے دوران ایرانی وزیرِ داخلہ اسکندر مومنی نے وزیراعظم، وزیرِ خارجہ اسحاق ڈار اور فیلڈ مارشل سید عاصم منیر کی جانب سے اسلام آباد مفاہمتی یادداشت کی منظوری کے لیے کی جانے والی ثالثی کوششوں کو سراہا، جبکہ سپریم لیڈر آیت اللہ سید علی خامنہ ای کی تعزیت کے سلسلے میں وزیراعظم کے تہران کے دورے پر بھی شکریہ ادا کیا۔