ایرانی وزیر خارجہ کی عراقی وزیراعظم سے ملاقات، تعاون جاری رکھنے پر زور

ایرانی وزیر خارجہ عباس عراقچی نے عراق کے وزیراعظم علی فتح زیدی سے اہم ملاقات کی ہے، جس میں خطے کی موجودہ صورتحال اور سفارتی تعلقات پر تفصیلی گفتگو کی گئی۔

بین الاقوامی خبر رساں ایجنسی کے مطابق، دونوں رہنماؤں کے درمیان ہونے والی اس اہم ملاقات میں خطے میں جاری جنگ کے فوری خاتمے اور پائیدار امن کے قیام کے لیے سفارتی کوششوں کو تیز کرنے پر تبادلہ خیال کیا گیا۔ ملاقات کے دوران ایرانی وزیر خارجہ نے علاقائی سیکیورٹی کی اہمیت پر زور دیتے ہوئے کہا “خطے کے تمام ممالک کو یہ یقینی بنانا چاہیے کہ ان کی سرزمین ایران کے خلاف کسی بھی قسم کی جارحیت یا کارروائی کے لیے استعمال نہ ہو۔” انہوں نے دونوں برادر ممالک کے درمیان باہمی تعاون کو مزید فروغ دینے اور جاری رکھنے کی ضرورت پر بھی زور دیا۔ دوسری جانب، عراقی وزیراعظم علی فتح زیدی نے جنگ کے خاتمے کے لیے جاری تمام مذاکرات اور سفارتی کوششوں کی بھرپور حمایت کا اعلان کیا۔ عراقی وزیراعظم کا کہنا تھا کہ عراق خطے میں مستقل امن و استحکام کے لیے سنجیدہ بات چیت اور ڈائیلاگ کو ہی سب سے اہم اور مؤثر راستہ سمجھتا ہے۔ دونوں فریقین نے کشیدگی کم کرنے کے لیے مل کر کام کرنے کے عزم کا اعادہ کیا۔