ایرانی سفیر کا شہید علی خامنہ ای کے جنازے میں شرکت پر پاکستان سے اظہار تشکر

پاکستان میں ایران کے سفیر رضا امیری مقدم نے ایرانی سپریم لیڈر علی خامنہ ای کے جنازے میں شرکت پر پاکستانی قیادت اور عوام کا شکریہ ادا کیا ہے۔

سماجی رابطے کے پلیٹ فارم ایکس (ٹویٹر) پر جاری اپنے ایک بیان میں ایرانی سفیر نے کہا کہ وہ ایرانی حکومت اور عوام کی جانب سے شہید رہبر کے جنازے میں پاکستان کی شرکت پر تہہ دل سے شکر گزار ہیں۔ انہوں نے اس تاریخی تقریب میں شرکت پر وزیراعظم شہباز شریف، فیلڈ مارشل اور نائب وزیراعظم کا خصوصی شکریہ ادا کیا۔

رضا امیری مقدم نے اپنے بیان میں چیئرمین سینیٹ یوسف رضا گیلانی، اسپیکر قومی اسمبلی ایاز صادق، وزیر داخلہ محسن نقوی، وزیر اطلاعات عطا تارڑ سمیت دیگر اعلیٰ حکام، مذہبی شخصیات، سیاسی رہنماؤں اور ثقافتی شخصیات کی شرکت پر بھی ممنونیت کا اظہار کیا۔

ایرانی سفیر کا کہنا تھا کہ پاکستان نے اس تقریب میں اعلیٰ ترین سطح پر شرکت کر کے دونوں برادر ممالک کے درمیان دیرینہ دوستی اور باہمی احترام کا ثبوت دیا ہے۔ یہ اقدام ایران اور پاکستان کے تاریخی روابط اور مشترکہ اقدار کی عکاسی کرتا ہے کیونکہ دونوں ممالک نے تاریخ کے ہر مشکل اور خوشی کے موقع پر ہمیشہ ایک دوسرے کا ساتھ دیا ہے۔ انہوں نے دعا کی کہ اللہ تعالیٰ ایران اور پاکستان کی دوستی اور برادرانہ تعلقات کو آنے والی نسلوں تک ہمیشہ قائم اور مزید مضبوط رکھے۔