ایران کا امریکی کارروائیوں کا منہ توڑ جواب دینے کا اعلان

ایران نے اپنے جنوبی علاقوں پر امریکی حملوں کے بعد سخت ردعمل ظاہر کرتے ہوئے خبردار کیا ہے کہ ان فوجی کارروائیوں کا منہ توڑ جواب دیا جائے گا۔ خاتم الانبیا مشترکہ فوجی ہیڈکوارٹرز کی جانب سے جاری بیان میں کہا گیا ہے کہ حالیہ امریکی حملوں کے سنگین نتائج برآمد ہوں گے اور ایرانی مسلح افواج اس کا بھرپور جواب دیں گی۔ دوسری جانب ایرانی پارلیمنٹ کے سپیکر محمد باقر قالیباف نے امریکہ کو کڑی تنبیہ کرتے ہوئے کہا کہ اب دھونس، دھمکیوں اور وعدہ خلافیوں کی قیمت چکانے کا وقت آ گیا ہے؛ اگر حملہ کرو گے تو جواب بھی ملے گا۔ انہوں نے آبنائے ہرمز پر امریکی دباؤ کو یکسر مسترد کرتے ہوئے واضح کیا کہ یہ اہم عالمی آبی گزرگاہ امریکی دھمکیوں سے نہیں بلکہ صرف ایرانی انتظامات کے تحت ہی کھلے گی۔ قالیباف نے مزید کہا کہ امریکہ بے مقصد ہاتھ پاؤں نہ مارے، ورنہ وہ اس دلدل میں مزید دھنستا چلا جائے گا۔