ایرانی قیادت اور عوام پر یقین، خطے میں امن، خوشحالی اور استحکام چاہتے ہیں: پاکستان

وزارت خارجہ کے ترجمان طاہر حسین اندرابی نے ہفتہ وار بریفنگ میں کہا کہ پاکستان ایران کے مسئلے کا پرامن حل چاہتا ہے اور امن کے لیے اپنا کردار جاری رکھے گا۔ پاکستان ایران کے امن و استحکام کی حمایت کرتا ہے اور امید ہے کہ ایران جلد اپنے بحران پر قابو پا لے گا۔

ترجمان نے کہا کہ پاکستان امریکی ویزا پابندیوں کے معاملے پر بھی واشنگٹن کے ساتھ رابطے میں ہے اور امید ہے کہ جلد پاکستانیوں کے لیے ویزے بحال ہو جائیں گے۔

دفتر خارجہ نے بھارتی آرمی چیف کے حالیہ بیانات کو مسترد کرتے ہوئے کہا کہ مقبوضہ کشمیر میں بھارتی مظالم اور بھارت میں اقلیتوں کے خلاف نفرت انگیز بیانیہ پوری دنیا کے سامنے ہیں۔

پاکستانی نائب وزیراعظم اور وزیر خارجہ نے او آئی سی کے غیر معمولی اجلاس کے دوران فلسطین اور کشمیر کے معاملات کو اجاگر کیا اور رکن ممالک سے زور دیا کہ وہ جموں و کشمیر کے عوام کے حق خود ارادیت کے لیے اپنا کردار مضبوط کریں۔

ترجمان نے مزید کہا کہ نائب وزیراعظم نے سعودی عرب کے نائب وزیر خارجہ کے ساتھ ملاقات کی اور نئے دفتر کی افتتاحی تقریب میں شرکت کے بعد پودے لگانے کی تقریب میں بھی حصہ لیا۔ وزیراعظم شہبازشریف نے امیر قطر سے ٹیلی فون پر بات کی اور دونوں رہنماؤں نے دوطرفہ تعلقات کے فروغ پر اتفاق کیا۔

صدر آصف علی زرداری بحرین کے دورے پر ہیں، جس میں دوطرفہ اور عالمی امور زیر بحث آئیں گے۔ پاکستان نے او آئی سی اجلاس میں صومالی لینڈ سے متعلق اپنا موقف دہرایا اور اسرائیل کے اقدام کی مذمت کی۔