امریکا سے لڑائی کے باوجود ثالثوں کے ذریعے پیغامات کا تبادلہ ہو رہا ہے: ایران

ایران کی وزارتِ خارجہ کے ترجمان اسماعیل بقائی نے انکشاف کیا ہے کہ جاری لڑائی کے باوجود امریکا اور ایران کے درمیان ثالثوں کے ذریعے سفارتی پیغامات کا تبادلہ اور سفارتی سرگرمیاں مسلسل جاری ہیں۔ تہران میں پریس کانفرنس سے خطاب کرتے ہوئے انہوں نے واضح کیا کہ ایران کی کسی علاقائی ملک سے دشمنی نہیں لیکن اپنی سرزمین کو ایرانی خلاف ورزیوں کے لیے استعمال نہ ہونے دینا دیگر ممالک کی ذمہ داری ہے۔ انہوں نے خبردار کیا کہ اگر امریکا نے صوبہ بوشہر کے ساحل سے 55 کلومیٹر دور واقع تیل کی صنعت کے مرکزی مرکز ‘خارگ جزیرے’ پر قبضہ کرنے کی مہم جوئی کی تو اسے سنگین نتائج بھگتنا ہوں گے۔ ترجمان کا مزید کہنا تھا کہ امریکا کے ساتھ طے پانے والے 14 شقوں پر مشتمل عبوری معاہدے کے متن میں کوئی ابہام نہیں، اور ایران نے پہلے ہی واضح کر دیا تھا کہ آبنائے ہرمز کے مستقبل کے انتظام کی بنیادی ذمہ داری اسی پر عائد ہوتی ہے۔