ایران نے دوبارہ امریکی حملوں پر آبنائے ہرمز بند کرنے کی دھمکی دیدی

ایران نے امریکا کی جانب سے کی جانے والی حالیہ عسکری کارروائیوں کے جواب میں آبنائے ہرمز کو بند کرنے کی سخت دھمکی دے دی ہے۔ ایرانی میڈیا کے مطابق حکام نے واضح کیا ہے کہ دشمن کے ہر ایک حملے کا جواب دو حملوں سے دیا جائے گا، جبکہ امریکی صدر ڈونلڈ ٹرمپ کی جانب سے جزیرہ خارگ پر قبضے کے بیان پر بھی ایران نے سخت تنبیہ جاری کی ہے۔ ایران کے پارلیمانی قومی سلامتی کمیشن کے ترجمان ابراہیم رضائی نے انتہائی جارحانہ موقف اختیار کرتے ہوئے کہا ہے کہ اگر امریکا نے حماقت کی تو ایک بھی امریکی فوجی زندہ واپس نہیں جائے گا۔ انہوں نے ایران کے خلاف امریکا کا ساتھ دینے والے خلیجی ممالک کو بھی سخت الفاظ میں خبردار کرتے ہوئے کہا کہ وہ اپنے تیل اور گیس کے کنوؤں کی حفاظت کریں، کیونکہ ایران اپنے قومی مفادات کے تحفظ کے لیے کسی بھی حد تک جا سکتا ہے۔ اس کے ساتھ ہی ایران نے آبنائے ہرمز میں اپنے نئے انتظام و انصرام کو تسلیم کرنے کا بھی مطالبہ کر دیا ہے۔

دوسری جانب ایرانی وزارتِ خارجہ کے ترجمان اسماعیل بقائی نے موجودہ بحران کا ذمہ دار واشنگٹن کو ٹھہراتے ہوئے کہا ہے کہ امریکا نے مفاہمتی یادداشت کی شرائط کو یکسر پامال کیا ہے۔ ان کا کہنا تھا کہ حالیہ امریکی حملوں نے سابقہ معاہدوں کو شدید نقصان پہنچایا ہے اور امریکا نے جان بوجھ کر معاہدے کی پانچویں شق کو نظرانداز کیا ہے۔ ترجمان نے اعادہ کیا کہ ایران اپنی قومی خودمختاری اور مفادات کا ہر قیمت پر دفاع کرے گا، تاہم انہوں نے یہ بھی واضح کیا کہ آبنائے ہرمز میں محفوظ جہاز رانی کی اصل ذمہ داری ہمیشہ کی طرح ایران کی ہی ہے۔ ایران کے اس سخت ترین موقف اور خلیجی ممالک کو دی جانے والی کھلی وارننگ کے بعد خطے میں پائے جانے والے عالمی توانائی کے بحران اور جنگ کے خطرات مزید سنگین ہو گئے ہیں۔