سکیورٹی خدشات، مجتبیٰ خامنہ ای والد کی نماز جنازہ میں شریک نہیں ہونگے

ایران کے سپریم لیڈر آیت اللہ مجتبیٰ خامنہ ای سیکیورٹی خدشات کے باعث اپنے والد اور ایران کے سابق رہبرِ انقلاب شہید آیت اللہ علی خامنہ ای کی نمازِ جنازہ میں شرکت نہیں کریں گے۔

تفصیلات کے مطابق، ایرانی شوریٰ نگہبان کی جانب سے رہبرِ انقلاب شہید آیت اللہ علی خامنہ ای کو خراجِ عقیدت پیش کرنے کے لیے ایک تقریب منعقد کی گئی، جس میں ایرانی صدر مسعود پزشکیان، اسپیکر پارلیمنٹ باقر قالیباف، وزیر خارجہ عباس عراقچی اور ایرانی فوج کے کمانڈر سمیت دیگر اعلیٰ سول و فوجی عہدے داروں نے شرکت کی۔ اس موقع پر دنیا بھر سے تہران پہنچنے والے وفود نے بھی شہید خامنہ ای کو زبردست خراجِ عقیدت پیش کیا۔ حکام کے مطابق، نمازِ جنازہ میں کئی سربراہانِ مملکت سمیت 100 سے زائد ممالک کے مندوبین شریک ہوں گے۔

ذرائع کا کہنا ہے کہ سیکیورٹی وجوہات کی بنا پر موجودہ سپریم لیڈر آیت اللہ مجتبیٰ خامنہ ای اپنے والد کے جنازے میں خود موجود نہیں ہوں گے۔ طے شدہ شیڈول کے مطابق، تہران میں نمازِ جنازہ کی ادائیگی کے بعد شہید کا جسدِ خاکی پہلے ایران کے مقدس شہر قُم، پھر عراق میں نجف اشرف اور کربلائے معلیٰ لے جایا جائے گا۔ عتبات عالیہ کی زیارت اور وہاں جلوسِ جنازہ کے بعد میت کو واپس ایران لایا جائے گا، جہاں آیت اللہ علی خامنہ ای کو ان کے آبائی شہر مشہد مقدس میں سپردِ خاک کیا جائے گا۔

ایرانی حکام کا کہنا ہے کہ شہید رہبرِ انقلاب کے جلوسِ جنازہ میں ایک کروڑ سے زائد سوگواروں کی شرکت متوقع ہے۔ اس عظیم قومی سانحے پر ایرانی حکومت کی جانب سے 8 جولائی کو ملک گیر یومِ سوگ کا باقاعدہ اعلان کیا گیا ہے