مشہد میں شہید آیت اللہ علی خامنہ ای کی نمازِ جنازہ، لاکھوں سوگواروں کی شرکت

ایران کے مقدس شہر مشہد میں شہید سپریم لیڈر آیت اللہ علی خامنہ ای کی نمازِ جنازہ انتہائی عقیدت و احترام اور گہرے سوگ کے ساتھ ادا کر دی گئی ہے، جس میں لاکھوں سوگواروں نے شرکت کر کے اپنے رہبرِ معظم کو الوداعی خراجِ عقیدت پیش کیا۔ اس تاریخی نمازِ جنازہ میں ملک بھر سے آئے ہوئے لاکھوں عام شہریوں، جید مذہبی شخصیات، اعلیٰ سویلین و عسکری حکام اور زندگی کے مختلف شعبوں سے تعلق رکھنے والے افراد نے شرکت کی، جس کے باعث مشہد کی تمام شاہراہیں سوگواروں سے بھر گئیں اور فضا نوحہ و دعا سے گونجتی رہی۔ ایرانی عسکری و سرکاری حکام کے مطابق، شہید آیت اللہ علی خامنہ ای کو مشہد میں روضۂ حضرت امام رضا علیہ السلام کے احاطے میں سپردِ خاک کیا جائے گا، جہاں تدفین کے تمام مذہبی و انتظامی امور مکمل کر لیے گئے ہیں اور زائرین کے جمِ غفیر کے پیشِ نظر سکیورٹی کے انتہائی سخت ترین انتظامات نافذ ہیں۔

واضح رہے کہ آیت اللہ علی خامنہ ای 28 فروری کو ایران پر ہونے والے یکطرفہ امریکی اور اسرائیلی فضائی حملوں کے نتیجے میں شہید ہوئے تھے، جس کے بعد سے پورے خطے میں سوگ کا سماں ہے۔ مشہد سے قبل شہید قائد کے جسدِ خاکی کو عراق لے جایا گیا تھا جہاں نجف اشرف میں روضہ حضرت علی رضی اللہ تعالیٰ عنہ اور کربلا معلیٰ میں روضہ امام حسین علیہ السلام پر لاکھوں سوگواروں کی موجودگی میں الوداعی مراسم اور نمازِ جنازہ ادا کی گئی۔ ایرانی حکام نے میڈیا کو بتایا کہ حالیہ امریکی حملوں کے نتیجے میں تہران اور مشہد کے درمیان ریلوے رابطہ متاثر ضرور ہوا تھا، تاہم اس سے جنازے کے پروگرام پر کوئی اثر نہیں پڑا؛ جنازے کے شیڈول میں معمولی تاخیر کی اصل وجہ بدھ کے روز عراق میں زائرین اور عزاداروں کا غیر معمولی اور تاریخی ہجوم تھا۔ مشہد میں جمع ہونے والے لاکھوں سوگواروں نے شہید رہنما کی ملکی، قومی اور اسلامی خدمات کو شاندار الفاظ میں خراجِ تحسین پیش کرتے ہوئے ان کے مشن کو ہر قیمت پر جاری رکھنے کے عزم کا اعادہ کیا ہے۔