توجہ دفاع پر مرکوز، ابھی ہمارا کسی سے بات چیت کا کوئی ارادہ نہیں: ایران

ایرانی وزارتِ خارجہ کے ترجمان اسماعیل بقائی نے دوٹوک مؤقف اختیار کرتے ہوئے واضح کیا ہے کہ اس وقت ایران کا کسی بھی ملک یا فریق سے بات چیت یا مذاکرات کا کوئی ارادہ نہیں ہے۔ میڈیا بریفنگ کے دوران ترجمان نے کہا کہ اس نازک وقت میں ہماری تمام تر توجہ اپنے ملک کے مضبوط دفاع پر مرکوز ہے۔ انہوں نے امریکا پر کڑی تنقید کرتے ہوئے الزام عائد کیا کہ واشنگٹن نے اپنے کیے گئے وعدے پورے نہ کر کے جوہری معاہدے اور مفاہمتی یادداشت کے تحت اپنی تمام تر بین الاقوامی ذمہ داریاں خود ترک کی ہیں۔

اسماعیل بقائی نے مزید کہا کہ جب دوسرے فریق نے جان بوجھ کر اپنے وعدوں سے انحراف کیا اور معاہدے سے پیچھے ہٹا، تو ایران کو بھی مجبوراً اپنے مفادات کے تحفظ کے لیے ان ذمہ داریوں سے گریز کرنا پڑا۔ انہوں نے واضح کیا کہ تہران کسی بھی یکطرفہ دباؤ یا معاہدے کی خلاف ورزی کے سامنے خاموش نہیں رہے گا اور اپنی دفاعی صلاحیتوں پر کوئی سمجھوتہ نہیں کرے گا۔