امریکا کیساتھ تنازع ایران کے ہتھیار ڈالنے سے کبھی ختم نہیں ہوگا، باقر قالیباف

ایران کے اعلیٰ مذاکرات کار اور پارلیمنٹ کے اسپیکر محمد باقر قالیباف نے واضح کیا ہے کہ دنیا بھر کے ممالک کے لیے جنگ کا خاتمہ ترجیح ہونا چاہیے، تاہم سب کو یہ سمجھ لینا چاہیے کہ امریکہ کے ساتھ تنازع ایران کے ہتھیار ڈالنے سے کبھی ختم نہیں ہو سکتا۔ ایرانی سرکاری نشریاتی ادارے آئی آر آئی بی (IRIB) کے مطابق، انڈونیشیا کی پارلیمنٹ کے اسپیکر سے ملاقات کے دوران گفتگو کرتے ہوئے محمد باقر قالیباف نے کہا کہ ایران نے اپنے ملک کے دفاع کی تیاری کبھی نہیں روکی۔ انہوں نے خبردار کیا کہ اگر امریکہ حالیہ معاہدے سے پیچھے ہٹا تو ایران ہر قسم کے دفاع کے لیے مکمل طور پر تیار ہے۔ ایرانی اسپیکر نے مزید کہا کہ ایران کو امریکہ پر کسی قسم کا اعتماد نہیں ہے اور مذاکرات کے دوران بھی امریکی نائب صدر کو واضح طور پر بتا دیا گیا تھا کہ ہمیں واشنگٹن پر بالکل بھروسہ نہیں۔ واضح رہے کہ گزشتہ ماہ ایران اور امریکہ کے درمیان 14 نکاتی مفاہمتی یادداشت طے پائی تھی جس میں آبنائے ہرمز کو کھولنے، پابندیوں میں نرمی اور جنگ بندی پر اتفاق ہوا تھا۔

دوسری جانب، امریکی صدر ڈونلڈ ٹرمپ نے تصدیق کی ہے کہ امریکہ نے ایران کی درخواست پر مذاکرات جاری رکھنے پر آمادگی ظاہر کی ہے، تاہم انہوں نے دوٹوک انداز میں ایک بار پھر واضح کیا ہے کہ ایران کے ساتھ جنگ بندی اب مکمل طور پر ختم ہو چکی ہے اور اسے بحال نہیں کیا جائے گا۔