آیت اللہ علی خامنہ ای کی شہادت کا بدلہ لیں گے، ایران کی اعلیٰ سلامتی قیادت کا انتباہ

ایران کی اعلیٰ سلامتی کونسل کے سیکریٹری محمد باقر ذوالقدر نے اپنے ایک سخت بیان میں کہا ہے کہ رہبرِ معظم اور ایرانی عوام کے خلاف سنگین جرائم میں ملوث عناصر کو “مناسب وقت” پر بھرپور جواب دیا جائے گا۔ یہ بیان ایسے وقت میں سامنے آیا ہے جب پورا ملک آیت اللہ سید علی خامنہ ای کی تدفین کی تیاریوں میں مصروف ہے۔

ایرانی میڈیا ‘پریس ٹی وی’ کے مطابق، محمد باقر ذوالقدر نے اپنے بیان میں کہا کہ رہبر کی شہادت کے وقت ان کی ‘بندھی ہوئی مٹھی’ ایران کے قومی سلامتی کے نظریے کی ایک دائمی اور لازوال علامت بن کر رہے گی۔ پاسدارانِ انقلاب (IRGC) کے سابق کمانڈر محمد باقر ذوالقدر کو مارچ 2026 میں اپنے پیشرو علی لاریجانی کی شہادت کے بعد اس عہدے پر تعینات کیا گیا تھا۔ انہوں نے واضح کیا کہ آیت اللہ علی خامنہ ای اور دیگر شہدا کے خون کا بدلہ لینے کا ارادہ اب بھی زندہ ہے اور ذمہ دار عناصر کو جلد اپنے انجام کا سامنا کرنا پڑے گا۔

واضح رہے کہ سپریم لیڈر آیت اللہ علی خامنہ ای 28 فروری 2026 کو اپنے دفتر میں ایک امریکی اور اسرائیلی حملے میں شہید ہوئے تھے۔ اس حملے میں سپریم لیڈر کی بیٹی، داماد اور نواسی کے علاوہ ان کے مشیر علی شمخانی اور پاسدارانِ انقلاب کے ممتاز کمانڈر محمد پاکپور بھی شہید ہوئے تھے۔

دوسری جانب، ایران کی گارڈین کونسل نے اپنے بیان میں اس حملے کو ایک “گھناؤنا جرم” قرار دیتے ہوئے کہا ہے کہ دشمن نے ایرانی قوم کے حوصلے پست کرنے کی ناپاک کوشش کی، تاہم وہ اس میں بری طرح ناکام رہا۔ کونسل کے مطابق، رہبر کی شہادت خود مزاحمت کی ایک نئی علامت بن گئی ہے جو فتح کی راہ دکھائے گی۔ بیان میں کہا گیا ہے کہ تدفین کی تقریبات ایک تاریخی موڑ ثابت ہوں گی اور ایرانی عوام کی ریکارڈ تعداد میں شرکت قوم اور انقلاب کے درمیان مضبوط تعلق کا اظہار کرے گی۔ گارڈین کونسل نے عوام سے اپیل کی ہے کہ وہ بڑی تعداد میں شرکت کر کے دنیا کو یہ پیغام دیں کہ رہبر کی شہادت نے قوم کے عزم کو مزید فولادی بنا دیا ہے۔

آیت اللہ سید علی خامنہ ای کی تدفین کی تقریبات جمعرات سے تہران، قم اور مشہد میں پانچ روز تک جاری رہیں گی۔ پاکستان کی جانب سے بھی اس موقع پر یکجہتی کا اظہار کیا گیا ہے۔ گزشتہ ہفتے ایرانی صدر مسعود پزشکیان سے ملاقات کے دوران صدرِ پاکستان آصف علی زرداری نے یقین دہانی کرائی تھی کہ ایک اعلیٰ سطح کا پاکستانی وفد بھی آیت اللہ خامنہ ای کے جنازے اور تدفین کی تقریبات میں شرکت کے لیے ایران جائے گا۔