امریکی جارحیت کا جواب، ایران کے بحرین اور کویت میں امریکی تنصیبات پر حملے

امریکی صدر ڈونلڈ ٹرمپ کی دھمکیوں اور حالیہ فضائی حملوں کے جواب میں ایران نے انتہائی جارحانہ قدم اٹھاتے ہوئے بحرین اور کویت میں قائم امریکی فوجی تنصیبات کو بڑے پیمانے پر نشانہ بنایا ہے، جس کے بعد مشرقِ وسطیٰ میں باقاعدہ جنگ کا خطرہ پیدا ہو گیا ہے۔

ایرانی سرکاری خبر رساں ادارے کے مطابق، ایران کی ایلیٹ فورس ’پاسدارانِ انقلاب‘ (IRGC) نے ایک باضابطہ بیان جاری کرتے ہوئے تصدیق کی ہے کہ انہوں نے بحرین اور کویت میں واقع امریکی فوجی اڈوں اور تنصیبات پر ڈرونز اور بیلسٹک میزائلوں سے مشترکہ طور پر حملہ کیا ہے۔ پاسدارانِ انقلاب کے اعلامیے کے مطابق، یہ کارروائی ایرانی نیوی اور ایئر اینڈ اسپیس فورس (فضائی و خلائی فورس) نے مشترکہ حکمتِ عملی کے تحت انجام دی ہے۔ بیان میں واضح کیا گیا ہے کہ یہ کارروائی جزیرہ قشم اور سرک پر ہونے والے حالیہ امریکی حملوں کا براہ راست اور منہ توڑ جواب ہے۔

ایرانی حکام نے سفارتی محاذ پر سخت موقف اپناتے ہوئے کہا کہ امریکہ کی جانب سے جنگ بندی کی خلاف ورزی دراصل ’اسلام آباد مفاہمتی یادداشت‘ کی شق نمبر 1 کے صریحاً منافی ہے۔ پاسدارانِ انقلاب نے خبردار کیا ہے کہ امریکی جارحیت کے باعث اب دونوں ممالک کے درمیان جاری تمام تر سفارتی عمل کو مکمل طور پر روک دیا جائے گا۔ اپنے بیان کے آخر میں ایرانی پاسدارانِ انقلاب نے امریکہ اور اس کے اتحادیوں کو آخری انتباہ جاری کرتے ہوئے کہا کہ اگر آئندہ کوئی بھی خلاف ورزی کی گئی تو اس کا جواب پہلے سے کہیں زیادہ سخت اور ہولناک ہوگا۔ انہوں نے اعادہ کیا کہ ایران کی خود مختاری کے خلاف کسی بھی قسم کے جارحانہ اقدام کا فیصلہ کن اور فوری جواب دیا جائے گا۔