ایران نے امریکی قیادت میں علاقائی سکیورٹی مذاکرات مسترد کر دیے

ایران نے بحرین میں امریکہ کی زیرِ قیادت منعقد ہونے والے علاقائی سکیورٹی مذاکرات کو یکسر مسترد کرتے ہوئے واضح کیا ہے کہ آبنائے ہرمز کا انتظام ایران کے اختیار میں ہے، امریکی سینٹ کام کے پاس نہیں۔

ایرانی نائب وزیر خارجہ کاظم غریب آبادی نے اپنے ایک بیان میں کہا کہ بحرین میں ہونے والا فوجی اجلاس خلیج فارس میں نہ تو کوئی قانونی نظام لا سکتا ہے اور نہ ہی سکیورٹی قائم کر سکتا ہے۔ انہوں نے دوٹوک انداز میں کہا کہ خطے کا پائیدار امن صرف اور صرف غیر ملکی مداخلت کے خاتمے، امریکی افواج کے مکمل انخلا، خطے کے تمام ممالک کی خودمختاری کے احترام اور نئی جغرافیائی حقیقتوں کو تسلیم کرنے سے ہی ممکن ہے۔

واضح رہے کہ امریکہ سمیت مشرقِ وسطیٰ کے 12 ممالک نے بحرین میں آبنائے ہرمز کی سکیورٹی اور سفارتی صورتحال سے متعلق ایک اہم اجلاس منعقد کیا تھا، جس کا مقصد اس حساس سمندری گزرگاہ کے تحفظ کو یقینی بنانا تھا، تاہم ایران نے اس اقدام کو خطے کے معاملات میں بیرونی مداخلت قرار دے کر مسترد کر دیا ہے۔