ایران نے بحرین میں امریکی قیادت میں سکیورٹی اجلاس مسترد کر دیا

ایرانی نائب وزیر خارجہ کاظم غریب آبادی نے بحرین میں امریکی قیادت میں ہونے والے علاقائی سکیورٹی اجلاس کو یکسر مسترد کرتے ہوئے واضح کیا ہے کہ آبنائے ہرمز کا انتظام امریکی سینٹکام (CENTCOM) کے پاس نہیں بلکہ مکمل طور پر ایران کے اختیار میں ہے۔

کاظم غریب آبادی نے بحرین میں ہونے والے فوجی اجلاس پر سخت ردعمل دیتے ہوئے کہا کہ اس نوعیت کے یکطرفہ اقدامات خلیج فارس میں کوئی قانونی نظام یا سکیورٹی قائم نہیں کر سکتے۔ ان کا کہنا تھا کہ خطے کا دیرپا امن و استحکام صرف اور صرف بیرونی اور غیر ملکی مداخلت کے خاتمے اور امریکی افواج کے مکمل انخلا سے ہی ممکن ہے۔

ایرانی نائب وزیر خارجہ نے مزید زور دیا کہ مڈل ایسٹ میں امن کا راستہ خطے کے تمام ممالک کی خودمختاری کے احترام اور زمین پر موجود نئی جغرافیائی حقیقتوں کو تسلیم کرنے سے ہو کر گزرتا ہے۔ واضح رہے کہ امریکہ سمیت 12 ممالک نے بحرین میں آبنائے ہرمز کی سکیورٹی اور جہاز رانی کے تحفظ کے نام پر ایک اہم فوجی اجلاس منعقد کیا تھا، جسے تہران نے اپنی خود مختاری اور علاقائی سلامتی کے خلاف قرار دیا ہے۔