ایران میں حکومت کے حق اور امریکا کے خلاف ریلیاں

ایران کے مختلف شہروں میں ہفتے کے روز ہونے والے حکومت مخالف مظاہروں کے بعد اتوار کو ملک بھر میں حکومت کے حق میں اور امریکہ کے خلاف بڑی ریلیاں نکالی گئیں۔ سرکاری سرپرستی میں نکلنے والی ان ریلیوں میں شرکاء نے حکومت کی حمایت میں نعرے بازی کی۔

دوسری جانب، تہران کی معروف تعلیمی درسگاہوں میں صورتحال بدستور کشیدہ ہے۔ سوشل میڈیا پر وائرل ہونے والی تصدیق شدہ ویڈیوز کے مطابق، امیر کبیر یونیورسٹی آف ٹیکنالوجی میں حکومت کے حامی اور مخالف طلبہ کے گروہوں کے درمیان شدید جھڑپیں ہوئیں۔ اس دوران بعض مظاہرین کی جانب سے بادشاہت کی بحالی کے حق میں بھی نعرے لگائے گئے۔

سرکاری خبر رساں ادارے ‘فارس نیوز ایجنسی’ نے تصدیق کی ہے کہ امیر کبیر یونیورسٹی، شریف یونیورسٹی اور یونیورسٹی آف ایران میں طلبہ کے ایک گروپ نے ‘انقلاب مخالف’ نعرے بازی کی۔ تہران یونیورسٹی کے پروفیسر حسین گلدانساز نے ‘مہر نیوز ایجنسی’ کو بتایا کہ جنوری کے ہنگاموں میں ہلاک ہونے والوں کے سوگ اور حالیہ بے چینی کے باعث جامعات میں تعلیمی سرگرمیاں بری طرح متاثر ہوئی ہیں۔