ایران نے حالیہ امریکی حملوں کیخلاف اقوام متحدہ کو احتجاجی خطوط ارسال کر دیے

ایران نے حالیہ امریکی حملوں کے خلاف سخت سفارتی ردعمل کا اظہار کرتے ہوئے اقوام متحدہ کی سلامتی کونسل کے صدر اور اقوام متحدہ کے سیکرٹری جنرل کو علیحدہ علیحدہ احتجاجی خطوط ارسال کر دیے ہیں۔ ایران کے سرکاری نشریاتی ادارے آئی آر آئی بی (IRIB) کے مطابق، اقوام متحدہ میں ایران کے مستقل مندوب امیر سعید ایروانی نے ان خطوط میں مؤقف اختیار کیا ہے کہ امریکہ نے ایک بار پھر ایران کی خودمختاری اور علاقائی سالمیت کے خلاف وسیع پیمانے پر فوجی حملے کیے ہیں۔ انہوں نے واضح کیا کہ یہ حملے اقوام متحدہ کے منشور اور امریکہ کی بین الاقوامی ذمہ داریوں سمیت منشور کے آرٹیکل 2 کی شق 4 کی کھلی خلاف ورزی ہیں۔ ایرانی مندوب نے مزید لکھا کہ یہ کارروائیاں 16 جون کو طے پانے والی مفاہمتی یادداشت کی پہلی شق کی بھی بنیادی خلاف ورزی شمار ہوتی ہیں۔