ایران نے دفاعی ہتھیاروں کی بڑے پیمانے پر پیداوار شروع کردی

ایران نے امریکہ اور اسرائیل کے ساتھ رواں سال ہونے والی معرکہ آرائی اور جنگی تجربات کی روشنی میں مقامی سطح پر تیار کردہ جدید دفاعی ہتھیاروں اور عسکری نظام کی بڑے پیمانے پر پیداوار کا باضابطہ آغاز کر دیا ہے۔ ایرانی ایئر ڈیفنس چیف بریگیڈیئر جنرل علی رضا الہامی نے میڈیا سے گفتگو کرتے ہوئے بتایا کہ حالیہ جنگ کے دوران ملکی سطح پر تیار کیے گئے دفاعی سسٹمز اور ٹیکنالوجی کی کارکردگی انتہائی کامیاب رہی، جس کے فوری بعد ان کی تیز رفتار تیاری (مااس پروڈکشن) کا عمل شروع کر کے انہیں ملک بھر کی اہم اور حساس تنصیبات پر تعینات کیا جا رہا ہے۔

بریگیڈیئر جنرل علی رضا الہامی نے کہا کہ ملکی ساختہ میزائلوں، جدید ڈرونز اور فضائی دفاعی سسٹمز (ایئر ڈیفنس سسٹمز) نے وطن کے دفاع اور دشمن کی پیشقدمی کو روکنے میں انتہائی کلیدی کردار ادا کیا۔ انہوں نے واضح کیا کہ مقامی بنیادوں پر تیار کردہ ہتھیاروں کا سب سے بڑا تزویراتی فائدہ یہ ہے کہ انہیں کسی بھی غیر ملکی سپلائر یا بیرونی تکنیکی امداد پر انحصار کیے بغیر، ابھرتے ہوئے نئے خطرات کے مطابق فوری اپ گریڈ کیا جا سکتا ہے۔ ان کا مزید کہنا تھا کہ یہ تمام دفاعی ہتھیار ایران کی مخصوص جغرافیائی، موسمی حالات اور جدید میدانِ جنگ کی عملی ضروریات کو مدِنظر رکھ کر ڈیزائن کیے گئے ہیں، اور ایران ان کی پیداواری صلاحیت اور مختلف جنگی مقاصد کے لیے ان کے استعمال کے دائرہ کار کو مزید وسیع کرے گا۔