ایران کا ٹرمپ کے آبنائے ہرمز پر کنٹرول سنبھالنے کے بیان پر ردعمل

ایران کی اعلیٰ مشترکہ فوجی کمان ‘خاتم الانبیا ہیڈکوارٹرز’ نے امریکی صدر ڈونلڈ ٹرمپ کے آبنائے ہرمز کا کنٹرول سنبھالنے اور تحفظ کے عوض دنیا سے معاوضہ وصول کرنے سے متعلق بیان پر شدید ردعمل کا اظہار کیا ہے۔ ایرانی مشترکہ فوجی کمان نے اپنے ایک باضابطہ بیان میں واضح طور پر کہا ہے کہ ایران   اہمیت کی حامل آبی گزرگاہ ‘آبنائے ہرمز’ کے انتظامات اور خودمختاری میں کسی بھی بیرونی قوت کی مداخلت کو برداشت نہیں کرے گا۔ بیان میں عزم کا اعادہ کیا گیا ہے کہ امریکا کو اس خطے کے معاملات پر اثر انداز ہونے کا کوئی حق نہیں ہے اور ایران کی منظوری یا رابطے کے بغیر کی جانے والی کسی بھی امریکی انتظامی سرگرمی کی بھرپور طریقے سے مزاحمت کی جائے گی۔

ایرانی فوجی کمان نے امریکی منصوبوں کو خبردار کرتے ہوئے مزید کہا کہ اگر آبنائے ہرمز کے بجائے کسی بھی متبادل راستے سے بحری آمدورفت کی کوشش کی گئی، تو ایسی تمام کوششوں کا رخ موڑنے کے لیے بھی سخت ترین مزاحمت کا سامنا کرنا پڑے گا۔ خاتم الانبیا ہیڈکوارٹرز کے مطابق، خطے یا دنیا کے کسی بھی ملک کی جانب سے امریکا کے ساتھ اس سلسلے میں کیا جانے والا تعاون براہِ راست ایران کی خودمختاری کے خلاف سمجھا جائے گا اور اسے ایران کی قومی سلامتی کے لیے ایک سنگین خطرہ تصور کیا جائے گا۔ ایرانی کمان نے انتباہ جاری کیا کہ امریکا کی جانب سے کنٹرول سنبھالنے کا ایسا کوئی بھی غیر سنجیدہ اقدام پورے خطے کے لیے انتہائی خطرناک ثابت ہو سکتا ہے اور اس کے نتیجے میں بھڑکنے والی جنگ خطے کے تمام ممالک کو اپنی لپیٹ میں لے سکتی ہے