سرحدی علاقے میں علیحدگی پسند گروہ کے داخلے کی کوشش ناکام بنا دی، پاسداران انقلاب

ایران کے پاسدارانِ انقلاب (IRGC) نے ملک کے شمال مغربی سرحدی علاقے میں ایک مسلح علیحدگی پسند گروہ کے داخلے کی کوشش کو کامیابی سے ناکام بنا دیا ہے۔

ایرانی پاسدارانِ انقلاب کے ترجمان کے مطابق، یہ مسلح گروہ پڑوسی ملک کی سرحد سے ایران میں داخل ہو کر بڑے پیمانے پر تخریبی اور دہشت گردانہ کارروائیاں کرنے کا ناپاک ارادہ رکھتا تھا۔

ایران کی نیم سرکاری خبر رساں ایجنسی ‘تسنیم’ کی رپورٹ کے مطابق، سکیورٹی فورسز نے خفیہ اطلاعات کی بنیاد پر فوری کارروائی کی اور سرحدی علاقے میں پہلے سے گھات لگا کر اس گروہ کو نشانہ بنایا۔ فائرنگ کے شدید تبادلے کے بعد کارروائی کے دوران دہشت گرد گروہ کے تمام 6 ارکان مارے گئے۔

خیال رہے کہ ایران کے مختلف سرحدی علاقوں میں کئی مسلح علیحدگی پسند اور عسکریت پسند گروہ سرگرم ہیں، جن کے خلاف ایرانی سکیورٹی فورسز اکثر سرحدوں پر ہائی الرٹ رہتی ہیں اور تہران ان گروہوں کو ملک کے امن و امان کے لیے ایک بڑا سکیورٹی خطرہ قرار دیتا ہے۔