ایران کی جنوبی کوریا کو خلیج فارس اور آبنائے ہرمز سے دور رہنے کی تنبیہ

تہران: ایرانی وزارتِ خارجہ نے جنوبی کوریا کو خلیجِ فارس اور آبنائے ہرمز کے تنازع سے دور رہنے کی تنبیہ کرتے ہوئے واضح کیا ہے کہ اس حساس سمندری خطے میں امریکی کارروائیوں کا حصہ بننے والے کسی بھی ملک کی فوجی موجودگی کو ایران کے خلاف مستقیم جارحیت تصور کیا جائے گا۔

ایرانی وزارتِ خارجہ کے ترجمان اسماعیل بقائی نے ہفتہ وار پریس بریفنگ کے دوران کہا کہ ایران اور جنوبی کوریا کے تعلقات 64 سال سے زائد عرصے پر محیط ہیں اور ہمیشہ باہمی احترام کی بنیاد پر استوار رہے ہیں۔ تاہم موجودہ حالات میں جب ایرانی عوام امریکی و اسرائیلی جارحیت کے خلاف اپنے دفاع میں مصروف ہیں، کسی بھی خودمختار ملک کو امریکی دباؤ اور دھمکیوں کے سامنے نہیں جھکنا چاہیے۔ ترجمان نے کہا کہ امریکہ نے خطے پر ناہق جنگ مسلط کی اور اب اس کے پیدا کردہ معاشی و تجارتی اثرات کی قیمت پوری دنیا سے وصول کرنا چاہتا ہے۔

اسماعیل بقائی نے مزید کہا کہ امریکی اور اسرائیلی حملوں سے قبل آبنائے ہرمز عالمی تجارتی جہاز رانی کے لیے مکمل طور پر کھلی ہوئی تھی۔ امریکہ کی جارحیت کے باعث ہی بین الاقوامی بحری نقل و حمل شدید متاثر ہوئی اور عالمی مارکیٹ میں توانائی کی قیمتوں میں اضافہ ہو رہا ہے۔ انہوں نے امریکہ کی جانب سے بحران کا ذمہ دار ایران کو ٹھہرانے کی کوششوں کو مضحکہ خیز قرار دیتے ہوئے کہا کہ دنیا کے سامنے اپنے ہی پیدا کردہ خلل کو دوسروں کے سر تھوپنا امریکہ کا پرانا طریقۂ کار ہے۔